ന്യൂഡൽഹി: ഇന്ത്യ കോളനിയല്ല, ജനാധിപത്യ രാഷ്ട്രമാണെന്ന് ഓർമിപ്പിച്ച് ഇലോൺ മസ്കിന്റെ വിമർശനത്തിന് മറുപടിയുമായി നടനും രാഷ്ട്രീയ നേതാവുമായ കമൽഹാസൻ. മസ്കിന്റെ സ്റ്റാർലിങ്ക് സാറ്റലൈറ്റ് ഇന്റർനെറ്റ് സേവനത്തിന് ഇന്ത്യയിൽ വാണിജ്യാടിസ്ഥാനത്തിൽ പ്രവർത്തനം തുടങ്ങാനുള്ള അനുമതി വൈകുന്നതുമായി ബന്ധപ്പെട്ട വിവാദത്തിലാണ് കമൽഹാസന്റെ പ്രതികരണം. രാജ്യത്തിന്റെ നയങ്ങൾ തീരുമാനിക്കേണ്ടത് കോടീശ്വരന്മാരല്ലെന്നും ഇന്ത്യയുടെ താൽപര്യങ്ങൾക്കും ദേശീയ സുരക്ഷയ്ക്കും മുൻഗണന നൽകണമെന്നും അദ്ദേഹം വ്യക്തമാക്കി.
ഇന്ത്യൻ വിപണിയിൽ സ്റ്റാർലിങ്കിന് പ്രവർത്തനാനുമതി ലഭിക്കാൻ വൈകുന്നതിനെ ചോദ്യം ചെയ്ത് മസ്ക് സമൂഹമാധ്യമമായ എക്സിൽ കുറിപ്പ് പങ്കുവച്ചിരുന്നു. 165-ലധികം രാജ്യങ്ങളിൽ സ്റ്റാർലിങ്കിന് അനുമതിയുണ്ടെന്നും ഇന്ത്യയിലെ നിയമങ്ങളും സർക്കാർ നിർദേശങ്ങളും പാലിക്കാൻ വർഷങ്ങളായി ശ്രമിക്കുന്നുണ്ടെന്നും അദ്ദേഹം അവകാശപ്പെട്ടു. എന്നിട്ടും അനുമതി വൈകുന്നതെന്തുകൊണ്ടാണെന്നും റിലയൻസ് ഗ്രൂപ്പ് ചെയർമാൻ മുകേഷ് അംബാനിയാണോ ഇന്ത്യയുടെ തീരുമാനങ്ങളെ സ്വാധീനിക്കുന്നതെന്നും മസ്ക് ചോദിച്ചിരുന്നു.
ഇതിന് മറുപടിയായാണ് കമൽഹാസൻ രംഗത്തെത്തിയത്. ഇന്ത്യയിലോ അമേരിക്കയിലോ ഒരു കോടീശ്വരനും രാജ്യത്തിന്റെ നയങ്ങൾ നിർണയിക്കാനുള്ള അധികാരം ഉണ്ടാകരുതെന്ന് അദ്ദേഹം പറഞ്ഞു. വിദേശ കമ്പനികൾക്ക് ഇന്ത്യയിൽ മത്സരിക്കാൻ അവസരം നൽകുന്നതിനെ പിന്തുണച്ച കമൽഹാസൻ, ഉപഗ്രഹ ഇന്റർനെറ്റ് സേവനങ്ങൾ സാധാരണക്കാർക്കും താങ്ങാനാകുന്ന വിലയിൽ ലഭ്യമാകേണ്ടതിന്റെ ആവശ്യകതയും ചൂണ്ടിക്കാട്ടി.
പ്രതിമാസ സബ്‌സ്‌ക്രിപ്ഷൻ നിരക്കും ഉപകരണങ്ങളുടെ വിലയും കൂടുതലായാൽ കുറഞ്ഞ വരുമാനമുള്ള കുടുംബങ്ങൾക്ക് ഇത്തരം സേവനങ്ങൾ ഉപയോഗിക്കാൻ കഴിയാതെ വരുമെന്ന് അദ്ദേഹം മുന്നറിയിപ്പ് നൽകി. വിദൂര പ്രദേശങ്ങളിലേക്കും ഗുണമേന്മയുള്ള ഇന്റർനെറ്റ് എത്തിക്കുകയാണ് സാങ്കേതികവിദ്യയുടെ ലക്ഷ്യമാകേണ്ടതെന്നും ഡിജിറ്റൽ വിടവ് വർധിപ്പിക്കുന്ന സാഹചര്യം ഉണ്ടാകരുതെന്നും കമൽഹാസൻ അഭിപ്രായപ്പെട്ടു.
അതേസമയം, രാജ്യത്തിന്റെ ടെലികോം ശൃംഖലകളും സ്പെക്ട്രവും വാണിജ്യ ആസ്തികൾ മാത്രമല്ല, തന്ത്രപ്രധാനമായ അടിസ്ഥാന സൗകര്യങ്ങളാണെന്നും അദ്ദേഹം വ്യക്തമാക്കി. ദേശീയ സുരക്ഷയുമായി ബന്ധപ്പെട്ട നിബന്ധനകളിൽ വിട്ടുവീഴ്ച ചെയ്യാനാകില്ലെന്നായിരുന്നു കമൽഹാസന്റെ നിലപാട്. അമേരിക്കയും ചൈനീസ് ഇലക്ട്രിക് വാഹനങ്ങൾക്കും ഹുവായ് പോലുള്ള കമ്പനികൾക്കും നിയന്ത്രണങ്ങൾ ഏർപ്പെടുത്തിയിട്ടുള്ള സാഹചര്യത്തിൽ, മറ്റ് രാജ്യങ്ങൾ ഇന്ത്യയുടെ നയങ്ങളെ മാത്രം ചോദ്യം ചെയ്യുന്നത് ഇരട്ടത്താപ്പാണെന്നും അദ്ദേഹം വിമർശിച്ചു.
ഇന്ത്യയിലെ ടെലികോം മേഖലയിലെ വെല്ലുവിളികൾ അംഗീകരിച്ച കമൽഹാസൻ, രാജ്യത്ത് കുറഞ്ഞ നിരക്കിൽ ഇന്റർനെറ്റ് ഡാറ്റ ലഭ്യമാക്കുന്നതിൽ ഇന്ത്യൻ ടെലികോം മേഖല കൈവരിച്ച നേട്ടങ്ങളും ചൂണ്ടിക്കാട്ടി. ഇന്ത്യ ലോകത്തെ സ്വാഗതം ചെയ്യുന്നുണ്ടെങ്കിലും രാജ്യത്തിന്റെ ഭാവി തീരുമാനിക്കേണ്ടത് ഇന്ത്യയിലെ ജനങ്ങളാണെന്നും പാശ്ചാത്യ താൽപര്യങ്ങളോ ഏതെങ്കിലും കോടീശ്വരനോ അല്ലെന്നും അദ്ദേഹം പറഞ്ഞു.
സ്റ്റാർലിങ്കിന്റെ അനുമതി വൈകുന്നതിൽ ആഭ്യന്തര വ്യവസായ താൽപര്യങ്ങൾ ഇടപെടുന്നുവെന്ന മസ്കിന്റെ ആരോപണം കേന്ദ്ര സർക്കാർ നേരത്തെ തള്ളിയിരുന്നു. ഉപഗ്രഹ ആശയവിനിമയ സേവനങ്ങൾക്കായി അനുമതി ലഭിച്ച സ്ഥാപനങ്ങൾ സുരക്ഷാ വ്യവസ്ഥകൾ പാലിക്കേണ്ടതുണ്ടെന്നും ബന്ധപ്പെട്ട പരിശോധനകൾ പൂർത്തിയാകാതെ വാണിജ്യ സേവനങ്ങൾ ആരംഭിക്കാനാകില്ലെന്നുമാണ് കേന്ദ്രത്തിന്റെ വിശദീകരണം.
കമൽഹാസന്റെ പ്രതികരണത്തെ ബിജെപി വക്താവ് പ്രീതി ഗാന്ധി സ്വാഗതം ചെയ്തു. രാഷ്ട്രീയ അഭിപ്രായവ്യത്യാസങ്ങൾക്കപ്പുറം ദേശീയ താൽപര്യത്തിന് മുൻഗണന നൽകേണ്ടതിന്റെ പ്രാധാന്യം ഈ വിഷയത്തിൽ ഉയർന്നുവന്നതായും അവർ അഭിപ്രായപ്പെട്ടു.
സ്റ്റാർലിങ്കിന്റെ ഇന്ത്യയിലെ പ്രവേശനവുമായി ബന്ധപ്പെട്ട വിവാദം ഇപ്പോൾ വിപണിയിലെ മത്സരം, ഉപഭോക്താക്കൾക്ക് താങ്ങാനാകുന്ന നിരക്ക്, ദേശീയ സുരക്ഷ, വിദേശ കമ്പനികളുടെ പ്രവർത്തനാനുമതി എന്നിവയെക്കുറിച്ചുള്ള വിശാലമായ ചർച്ചയായി മാറിയിരിക്കുകയാണ്.
