വാഷിങ്ടൺ: അമേരിക്കൻ വൈദ്യുതി ഗ്രിഡിന്റെ സുരക്ഷയ്ക്ക് വിദേശ നിർമിത ഉപകരണങ്ങൾ ഭീഷണിയാകാമെന്ന് ചൂണ്ടിക്കാട്ടി പ്രസിഡന്റ് ഡൊണാൾഡ് ട്രംപ് ദേശീയ അടിയന്തരാവസ്ഥ പ്രഖ്യാപിച്ചു. വൈദ്യുതി വിതരണ സംവിധാനത്തിലെ നിർണായക ഉപകരണങ്ങളിൽ വിദേശ ആശ്രിതത്വം കുറയ്ക്കുന്നതിന്റെ ഭാഗമായാണ് പുതിയ നടപടി.
ഓഗസ്റ്റ് 26ന് ഒപ്പുവെച്ച എക്സിക്യൂട്ടീവ് ഉത്തരവിലൂടെ സുരക്ഷാ ഭീഷണി ഉയർത്തുന്ന ചില വിദേശ നിർമിത ഉപകരണങ്ങൾ അമേരിക്കയിൽ വാങ്ങുന്നതും ഇറക്കുമതി ചെയ്യുന്നതും സ്ഥാപിക്കുന്നതും നിയന്ത്രിക്കാനാണ് സർക്കാർ ലക്ഷ്യമിടുന്നത്. വൈദ്യുതി ഗ്രിഡുമായി ബന്ധപ്പെട്ട നിർണായക സോഫ്റ്റ്വെയറുകളും ഡിജിറ്റൽ സംവിധാനങ്ങളും ഉത്തരവിന്റെ പരിധിയിൽ വരും.
വിദേശ ഉപകരണങ്ങളിലൂടെ സൈബർ ആക്രമണത്തിനോ അനധികൃത റിമോട്ട് ആക്സസിനോ മറ്റ് പ്രവർത്തന തടസ്സങ്ങൾക്കോ സാധ്യതയുണ്ടെന്നതാണ് അമേരിക്കൻ ഭരണകൂടത്തിന്റെ പ്രധാന ആശങ്ക. വിദേശ വിതരണ ശൃംഖലകളെ അമിതമായി ആശ്രയിക്കുന്നത് വ്യാപാര തടസ്സങ്ങളുണ്ടായാൽ നിർണായക ഉപകരണങ്ങളുടെ ലഭ്യതയെയും ബാധിക്കാമെന്നും ഉത്തരവിൽ പറയുന്നു.
അമേരിക്കയുടെ bulk-power system-ലാണ് പ്രധാനമായും പുതിയ നിയന്ത്രണങ്ങൾ ബാധകമാകുന്നത്. ഉയർന്ന വോൾട്ടേജ് ട്രാൻസ്മിഷൻ സംവിധാനങ്ങൾ, സബ്സ്റ്റേഷനുകൾ, വൈദ്യുതി ഉൽപാദനവുമായി ബന്ധപ്പെട്ട ചില ഉപകരണങ്ങൾ തുടങ്ങിയവ ഇതിൽ ഉൾപ്പെടുന്നു.
ട്രാൻസ്ഫോർമറുകൾ, ഇൻവെർട്ടറുകൾ, ബാറ്ററി എനർജി സ്റ്റോറേജ് സംവിധാനങ്ങൾ, ജനറേറ്ററുകൾ, സംരക്ഷണ സംവിധാനങ്ങൾ, വ്യാവസായിക കൺട്രോൾ സിസ്റ്റങ്ങൾ തുടങ്ങിയ ഉപകരണങ്ങളും പുതിയ സുരക്ഷാ പരിശോധനകളുടെ പരിധിയിൽ വരാം.
ഉത്തരവിൽ ഏതെങ്കിലും ഒരു രാജ്യത്തിന്റെ പേര് നേരിട്ട് പറയുന്നില്ലെങ്കിലും, ചൈനീസ് നിർമിത സാങ്കേതികവിദ്യയുമായി ബന്ധപ്പെട്ട സുരക്ഷാ ആശങ്കകളാണ് നടപടിക്ക് പിന്നിലെ പ്രധാന കാരണങ്ങളിലൊന്നായി അന്താരാഷ്ട്ര റിപ്പോർട്ടുകൾ വിലയിരുത്തുന്നത്. യൂറോപ്യൻ കമ്മീഷനും നേരത്തെ പൊതുധനസഹായമുള്ള ഊർജ പദ്ധതികളിൽ ചൈനീസ് നിർമിത ഇൻവെർട്ടറുകൾക്ക് നിയന്ത്രണം ഏർപ്പെടുത്തിയിരുന്നു.
ആർട്ടിഫിഷ്യൽ ഇന്റലിജൻസ് ഡാറ്റാ സെന്ററുകൾ, നൂതന വ്യവസായങ്ങൾ, പ്രതിരോധ മേഖല എന്നിവയുടെ വളർച്ചയോടെ അമേരിക്കയുടെ വൈദ്യുതി ആവശ്യകത വർധിച്ചുവരികയാണ്. അതിനാൽ വിശ്വസനീയമായ വൈദ്യുതി വിതരണം ദേശീയ സുരക്ഷയ്ക്കും സാമ്പത്തിക വളർച്ചയ്ക്കും കൂടുതൽ നിർണായകമായിരിക്കുകയാണെന്ന് ട്രംപ് ഭരണകൂടം ചൂണ്ടിക്കാട്ടുന്നു.
ഇതിനകം അമേരിക്കൻ വൈദ്യുതി ഗ്രിഡിൽ സ്ഥാപിച്ചിട്ടുള്ള വിദേശ ഉപകരണങ്ങളുടെ കാര്യത്തിലും നിയന്ത്രണങ്ങൾ ഏർപ്പെടുത്താനുള്ള അധികാരം ഊർജ വകുപ്പിന് നൽകുന്നുണ്ട്. ആവശ്യമായ സാഹചര്യത്തിൽ ഉപകരണങ്ങൾ തിരിച്ചറിയുക, നിരീക്ഷിക്കുക, സുരക്ഷിതമാക്കുക, വേർതിരിക്കുക, മാറ്റിസ്ഥാപിക്കുക തുടങ്ങിയ നടപടികൾ സ്വീകരിക്കാം.
അതേസമയം, പുതിയ നിയന്ത്രണങ്ങൾ അമേരിക്കൻ ഊർജ മേഖലയിലെ വിതരണ ശൃംഖലകളിലും വ്യവസായങ്ങളിലും വലിയ മാറ്റങ്ങൾക്ക് കാരണമാകാൻ സാധ്യതയുണ്ട്. വിദേശ ഉപകരണങ്ങൾക്ക് പകരം അമേരിക്കൻ നിർമിത ഉപകരണങ്ങൾ ഉപയോഗിക്കേണ്ടിവരുന്നത് ആഭ്യന്തര നിർമ്മാതാക്കൾക്ക് കൂടുതൽ അവസരങ്ങൾ സൃഷ്ടിക്കുമെന്നാണ് വിലയിരുത്തൽ.
സൈബർ സുരക്ഷയും ദേശീയ സുരക്ഷയും മുൻനിർത്തിയുള്ള നടപടിയാണിതെന്ന് അമേരിക്കൻ ഭരണകൂടം വ്യക്തമാക്കുമ്പോൾ, പുതിയ നിയന്ത്രണങ്ങൾ വൈദ്യുതി മേഖലയിലെ ചെലവുകളെയും വിതരണ ശൃംഖലകളെയും എങ്ങനെ ബാധിക്കുമെന്നത് വരും മാസങ്ങളിൽ വ്യക്തമാകും. പുതിയ നിയമങ്ങൾ നടപ്പാക്കുന്നതിനുള്ള വിശദമായ ചട്ടങ്ങൾ യുഎസ് ഊർജ വകുപ്പ് പിന്നീട് പുറത്തിറക്കും.
