സംസ്ഥാന ഖജനാവിൽ നിന്ന് പണമെടുത്ത് ജനപ്രതിനിധികൾ നടത്തുന്ന വിദേശ യാത്രകളെക്കുറിച്ചുള്ള വിമർശനങ്ങൾക്കിടയിൽ, നഗരസഭയുടെയോ സർക്കാരിന്റെയോ ഒരൊറ്റ രൂപ പോലും വിനിയോഗിക്കാതെ അമേരിക്കൻ പര്യടനം പൂർത്തിയാക്കി തിരുവനന്തപുരം മേയർ അഡ്വ. വി.വി. രാജേഷ്. ഉത്തര അമേരിക്കൻ മലയാളി സംഘടനയായ ഫൊക്കാനയുടെ (FOKANA) വാർഷിക ചടങ്ങിലേക്കുള്ള ക്ഷണപ്രകാരം നടത്തിയ ഈ യാത്രയുടെ താമസ, ഭക്ഷണ, യാത്രാ ചെലവുകൾ പൂർണ്ണമായും വഹിച്ചത് പ്രാദേശിക മലയാളി കൂട്ടായ്മകളും പ്രവാസി സംഘടനകളുമാണ്.
നാടിന്റെ വികസനത്തിനായി ഭരണാധികാരികൾക്ക് ഇച്ഛാശക്തിയുണ്ടെങ്കിൽ ഖജനാവ് മുടിക്കാതെ തന്നെ വിദേശ സാങ്കേതികവിദ്യകളും വികസന മാതൃകകളും സ്വന്തം നാട്ടിലെത്തിക്കാമെന്ന് തെളിയിക്കുന്നതാണ് ഈ സന്ദർശനം.
അമേരിക്കൻ പര്യടനത്തിനിടയിൽ ടെക്സസിലെ മസൂരി സിറ്റി മേയർ റോബിൻ എലക്കാട്ടുമായി വി.വി. രാജേഷ് നടത്തിയ കൂടിക്കാഴ്ച ഏറെ നിർണ്ണായകമായിരുന്നു. മസൂരി സിറ്റി അഡ്മിനിസ്ട്രേറ്റീവ് ടീമും സിറ്റി സെക്രട്ടറിയും പങ്കെടുത്ത ചർച്ചയിൽ മാലിന്യ സംസ്കരണ സംവിധാനങ്ങൾ, തെരുവുനായ്ക്കളുടെ സംരക്ഷണവും നിയന്ത്രണവും, ഐ.ടി-ആർട്ടിഫിഷ്യൽ ഇന്റലിജൻസ് (AI) സഹകരണം എന്നീ പ്രധാന വിഷയങ്ങളിലാണ് ഊന്നൽ നൽകിയത്. മസൂരി സിറ്റിയിലെ അത്യാധുനിക ഡോഗ് ഷെൽറ്ററുകളും മാലിന്യ സംസ്കരണ പ്ലാന്റുകളും അദ്ദേഹം നേരിട്ട് സന്ദർശിച്ചു.
കൂടാതെ, തിരുവനന്തപുരം നഗരസഭയും മസൂരി സിറ്റിയും തമ്മിൽ ‘സിസ്റ്റർ സിറ്റി’ (Sister City) ബന്ധം സ്ഥാപിക്കാനുള്ള പ്രാഥമിക നടപടികൾ ആരംഭിക്കാൻ മസൂരി സിറ്റി സെക്രട്ടറിയെ ചുമതലപ്പെടുത്തുകയും ചെയ്തിട്ടുണ്ട്.
ഐ.ടി മേഖലയുടെ വികസനത്തിനായി അമേരിക്കയിലെ പ്രമുഖ ഐ.ടി കമ്പനികളുമായും വിദഗ്ധരുമായും മേയർ ചർച്ചകൾ നടത്തി. ആഗോളതലത്തിൽ വളരുന്ന എ.ഐ സാങ്കേതികവിദ്യയുടെ ഗുണം തിരുവനന്തപുരത്തെ ഐ.ടി പ്രൊഫഷണലുകൾക്ക് ലഭ്യമാക്കാനും വിദേശ പ്രോജക്ടുകളിൽ പങ്കാളികളാകാനുമുള്ള സാധ്യതകൾ അദ്ദേഹം മുന്നോട്ടുവെച്ചു. അതിനോടൊപ്പം തന്നെ, സന്ദർശനത്തിലെ ഏറ്റവും പ്രധാനപ്പെട്ട പ്രഖ്യാപനം മുൻപ് മാലിന്യ നിക്ഷേപ കേന്ദ്രമായിരുന്ന വിളപ്പിൽശാലയിലെ നഗരസഭാ ഭൂമിയെക്കുറിച്ചുള്ളതായിരുന്നു.
പ്രദേശവാസികളുടെ പ്രതിഷേധത്തെ തുടർന്ന് അടച്ചുപൂട്ടിയ ഈ ഭൂമിയിൽ ലോകപ്രശസ്ത മെഡിക്കൽ സ്ഥാപനമായ മയോ ക്ലിനിക്കിലെ ഉന്നത ഉദ്യോഗസ്ഥനും ഓങ്കോളജിസ്റ്റുമായ ഡോ. എം.വി. പിള്ളയുടെ സഹകരണത്തോടെ ഒരു അന്താരാഷ്ട്ര ക്യാൻസർ റിസർച്ച് ആൻഡ് ഡയഗ്നോസിസ് സെന്റർ സ്ഥാപിക്കാനാണ് ലക്ഷ്യമിടുന്നത്.
മേയറുടെ ഈ വികസന ദൗത്യങ്ങൾക്ക് രാഷ്ട്രീയം മാറ്റിവെച്ച് പൂർണ്ണ പിന്തുണ നൽകുമെന്ന് സംസ്ഥാന സർക്കാരും വ്യക്തമാക്കിയിട്ടുണ്ട്. വികസന പദ്ധതികളുടെ ഭരണാനുമതിക്കായി പ്രതിപക്ഷ നേതാവ് വി.ഡി. സതീശൻ, സംസ്ഥാന ഐ.ടി-വ്യവസായ മന്ത്രിമാർ എന്നിവരുമായി മേയർ ആശയവിനിമയം നടത്തിക്കഴിഞ്ഞു. രാഷ്ട്രീയ വിയോജിപ്പുകൾക്കതീതമായി നാടിന്റെ വികസനത്തിന് വേണ്ടി ഒന്നിച്ചുനിൽക്കുന്ന ഈ നിലപാട് കേരള രാഷ്ട്രീയത്തിൽ തന്നെ ഒരു പുതിയ വികസന സംസ്കാരത്തിന് തുടക്കമിടുകയാണ്.
