16 വയസ്സിന് താഴെയുള്ള കുട്ടികളുടെ സോഷ്യൽ മീഡിയ ഉപയോഗത്തിന് നിയന്ത്രണം ഏർപ്പെടുത്തിയ ഓസ്ട്രേലിയൻ നിയമം കർശനമായി നടപ്പാക്കുന്നതിനിടെ മെറ്റ വൻതോതിൽ അക്കൗണ്ടുകൾ നിർജ്ജീവമാക്കി. പ്രായപൂർത്തിയാകാത്തവരുടേതെന്ന് സംശയിക്കുന്ന ഏഴ് ലക്ഷത്തിലേറെ ഫെയ്സ്ബുക്ക്, ഇൻസ്റ്റഗ്രാം അക്കൗണ്ടുകളാണ് കമ്പനി നീക്കം ചെയ്തതെന്ന് റിപ്പോർട്ട്. ഡിസംബർ മുതൽ ജൂൺ വരെയുള്ള ആറുമാസ കാലയളവിലാണ് ഈ നടപടി ഉണ്ടായത്.
റിപ്പോർട്ട് പ്രകാരം 4,62,000 ഇൻസ്റ്റഗ്രാം അക്കൗണ്ടുകളും 2,94,000 ഫെയ്സ്ബുക്ക് അക്കൗണ്ടുകളുമാണ് മെറ്റ നിർജ്ജീവമാക്കിയത്. 16 വയസ്സിന് താഴെയുള്ള കുട്ടികളുടെ സോഷ്യൽ മീഡിയ ഉപയോഗം നിയന്ത്രിക്കുന്ന ഓസ്ട്രേലിയൻ നിയമത്തിന്റെ ഭാഗമായാണ് നടപടികൾ ശക്തമാക്കിയത്.
കുട്ടികളുടെ ശാരീരികവും മാനസികവുമായ ക്ഷേമത്തെ സോഷ്യൽ മീഡിയ ഉപയോഗം ബാധിക്കുന്നതിനെക്കുറിച്ചുള്ള ആശങ്കകളാണ് ഓസ്ട്രേലിയയിൽ പ്രായപരിധി നിയന്ത്രണങ്ങൾ കൊണ്ടുവരുന്നതിനുള്ള പ്രധാന കാരണങ്ങളിലൊന്ന്. നിയമം പ്രാബല്യത്തിൽ വന്നതോടെ സോഷ്യൽ മീഡിയ കമ്പനികൾക്ക് പ്രായപരിധി പാലിക്കുന്നുണ്ടെന്ന് ഉറപ്പാക്കേണ്ട ബാധ്യതയും വർധിച്ചു.
പ്രായപൂർത്തിയാകാത്തവരെ തിരിച്ചറിയാൻ മെറ്റ നിർമിതബുദ്ധി സാങ്കേതികവിദ്യയും ഉപയോഗിക്കുന്നുണ്ട്. ഉപയോക്താക്കൾ പ്രൊഫൈലിൽ നൽകിയ ജനനത്തീയതി മാത്രം അടിസ്ഥാനമാക്കിയല്ല പരിശോധന നടത്തുന്നത്. അക്കൗണ്ടിലെ ചിത്രങ്ങൾ, സ്കൂൾ ഗ്രേഡുകളുമായി ബന്ധപ്പെട്ട പരാമർശങ്ങൾ, ചാറ്റുകളിലെ ചില സൂചനകൾ, മറ്റ് ഉപയോക്താക്കളുടെ റിപ്പോർട്ടുകൾ തുടങ്ങിയ വിവരങ്ങളും പ്രായം വിലയിരുത്തുന്നതിനായി പരിശോധിക്കുന്നതായി റിപ്പോർട്ട് പറയുന്നു.
ഒരു അക്കൗണ്ട് നീക്കം ചെയ്തതിന് ശേഷം വ്യാജ വിവരങ്ങൾ ഉപയോഗിച്ച് അതേ ഉപയോക്താവ് വീണ്ടും പ്ലാറ്റ്ഫോമിലേക്ക് എത്തുന്നത് തടയുന്നതിനുള്ള സംവിധാനങ്ങളും മെറ്റ ശക്തമാക്കുന്നുണ്ട്. ഇതോടെ പ്രായപരിധി മറികടന്ന് സോഷ്യൽ മീഡിയ ഉപയോഗിക്കാൻ ശ്രമിക്കുന്ന അക്കൗണ്ടുകളെ കണ്ടെത്തുന്നതിലും നിയന്ത്രിക്കുന്നതിലും കൂടുതൽ കർശനമായ സമീപനമാണ് കമ്പനി സ്വീകരിക്കുന്നത്.
നിയമം പാലിക്കുന്നതിൽ വീഴ്ച വരുത്തുന്ന സോഷ്യൽ മീഡിയ പ്ലാറ്റ്ഫോമുകൾക്കെതിരായ പിഴ വർധിപ്പിക്കുന്നതിനെക്കുറിച്ചും ഓസ്ട്രേലിയൻ സർക്കാർ ആലോചിക്കുന്നതായി റിപ്പോർട്ടിൽ പറയുന്നു. നിയമലംഘനങ്ങൾക്ക് നിലവിലുള്ള പിഴത്തുക 9.9 കോടി ഓസ്ട്രേലിയൻ ഡോളറായി ഉയർത്താനുള്ള നീക്കവും പരിഗണനയിലുണ്ട്.
പ്രായപരിധി നിയന്ത്രണം സോഷ്യൽ മീഡിയ കമ്പനികൾ എങ്ങനെ നടപ്പാക്കുന്നുവെന്ന് ഓസ്ട്രേലിയൻ അധികൃതർ പ്രത്യേകം നിരീക്ഷിക്കുന്നുണ്ട്. ഇതിന്റെ ഭാഗമായി മെറ്റ, ടിക്ടോക്, ഗൂഗിൾ, സ്നാപ്ചാറ്റ് തുടങ്ങിയ കമ്പനികളുടെ പ്രതിനിധികൾ പാർലമെന്ററി സമിതിയുടെ അന്വേഷണത്തിന് മുന്നിൽ ഹാജരാകേണ്ട സാഹചര്യമുണ്ടെന്നും റിപ്പോർട്ട് വ്യക്തമാക്കുന്നു.
ഓസ്ട്രേലിയയിലെ നടപടികൾക്ക് പുറമെ, സോഷ്യൽ മീഡിയ പ്ലാറ്റ്ഫോമുകളിലെ ഉള്ളടക്ക നിയന്ത്രണം ഉൾപ്പെടെയുള്ള വിഷയങ്ങളിൽ മെറ്റ ഇന്ത്യയിലും പാർലമെന്ററി പരിശോധന നേരിടുന്ന സാഹചര്യമാണ് നിലവിലുള്ളത്. കുട്ടികളുടെ ഓൺലൈൻ സുരക്ഷയും സോഷ്യൽ മീഡിയ ഉപയോഗത്തിന് പ്രായപരിധി വേണമോ എന്ന ചർച്ചയും ഇതോടെ കൂടുതൽ ശക്തമാകുകയാണ്.
[social-share id=384]
