ചെന്നൈ: തമിഴ്നാട്ടിലെ പറന്തൂരിൽ നിർമിക്കാൻ തീരുമാനിച്ചിരുന്ന പുതിയ ഗ്രീൻഫീൽഡ് വിമാനത്താവള പദ്ധതി ഉപേക്ഷിക്കുന്നതായി മുഖ്യമന്ത്രി സി. ജോസഫ് വിജയ് നിയമസഭയിൽ പ്രഖ്യാപിച്ചു. കൃഷിഭൂമിയെയും കർഷകരുടെയും പ്രദേശവാസികളുടെയും ഉപജീവനത്തെയും ബാധിക്കുന്ന സാഹചര്യം ഒഴിവാക്കുന്നതിനാണ് പദ്ധതി മറ്റൊരു സ്ഥലത്തേക്ക് മാറ്റുന്നതെന്ന് വിജയ് വ്യക്തമാക്കി.
ചെന്നൈയുടെ വർധിച്ചുവരുന്ന യാത്രക്കാരുടെ ആവശ്യങ്ങൾ, വ്യാവസായിക വളർച്ച, കാർഗോ ഗതാഗതം എന്നിവ കണക്കിലെടുക്കുമ്പോൾ പുതിയ വിമാനത്താവളം ആവശ്യമാണെന്ന് വിജയ് പറഞ്ഞു. എന്നാൽ അതിനായി തിരഞ്ഞെടുക്കുന്ന സ്ഥലം കൃഷിഭൂമിക്കും ജനവാസ മേഖലകൾക്കും ഏറ്റവും കുറഞ്ഞ ആഘാതം ഉണ്ടാക്കുന്നതായിരിക്കണമെന്നാണ് സർക്കാരിന്റെ നിലപാട്.
പറന്തൂർ വിമാനത്താവള പദ്ധതിക്കെതിരെ പ്രദേശവാസികൾ നേരത്തെ ശക്തമായ പ്രതിഷേധം നടത്തിയിരുന്നു. 2025 ജനുവരി 20ന് എഗനപുരം ഉൾപ്പെടെയുള്ള ഗ്രാമങ്ങൾ സന്ദർശിച്ച് പ്രതിഷേധക്കാരുമായി സംസാരിച്ചിരുന്നുവെന്നും അവരുടെ ആശങ്കകൾ നേരിട്ട് മനസ്സിലാക്കിയിരുന്നുവെന്നും വിജയ് നിയമസഭയിൽ പറഞ്ഞു. കർഷകരുടെ ഉപജീവനം സംരക്ഷിക്കുന്ന നിലപാടിനൊപ്പമാണ് താനെന്നും അദ്ദേഹം വ്യക്തമാക്കി.
നിലവിലെ ചെന്നൈ മീനമ്പാക്കം വിമാനത്താവളത്തിന് പ്രതിവർഷം ഏകദേശം 3 കോടി യാത്രക്കാരെ കൈകാര്യം ചെയ്യാനുള്ള ശേഷിയുണ്ടെന്ന് വിജയ് ചൂണ്ടിക്കാട്ടി. നഗരത്തിന്റെ ഭാവിയിലെ ആവശ്യങ്ങൾ കണക്കിലെടുക്കുമ്പോൾ രണ്ടാമത്തെ വിമാനത്താവളം ആവശ്യമാണ്. അതിനാൽ പറന്തൂരിന് പകരം മറ്റൊരു അനുയോജ്യമായ സ്ഥലം കണ്ടെത്താനാണ് സർക്കാർ നീക്കം.
അതേസമയം, പദ്ധതി ഉപേക്ഷിച്ച സർക്കാർ തീരുമാനത്തിനെതിരെ പ്രതിപക്ഷത്ത് നിന്ന് വിമർശനവും ഉയർന്നു. മുൻ മുഖ്യമന്ത്രി എം.കെ. സ്റ്റാലിൻ ഇത് തമിഴ്നാടിന്റെ വികസനത്തിന് തിരിച്ചടിയാകുമെന്ന് ആരോപിച്ചു. വ്യവസായ നിക്ഷേപങ്ങളെയും തൊഴിൽ അവസരങ്ങളെയും തീരുമാനം ബാധിക്കുമെന്ന ആശങ്കയും അദ്ദേഹം പ്രകടിപ്പിച്ചു.
ബിജെപി നേതാവ് കെ. അണ്ണാമലൈയും പദ്ധതിയുടെ റദ്ദാക്കലിനെ വിമർശിച്ചു. ചെന്നൈയുടെ രണ്ടാമത്തെ വിമാനത്താവളത്തിനായി പുതിയ സ്ഥലം കണ്ടെത്തുകയും അനുമതികൾ നേടുകയും ഭൂമി ഏറ്റെടുക്കുകയും നിർമാണ നടപടികൾ പൂർത്തിയാക്കുകയും ചെയ്യാൻ വർഷങ്ങൾ വേണ്ടിവരുമെന്ന് അദ്ദേഹം ചൂണ്ടിക്കാട്ടി.
പറന്തൂരിന് പകരം ചെന്നൈയ്ക്ക് സമീപം പുതിയ സ്ഥലം കണ്ടെത്താനുള്ള നടപടികളാണ് ഇനി തമിഴ്നാട് സർക്കാർ സ്വീകരിക്കുക. കൃഷിഭൂമിക്കും ജനവാസ കേന്ദ്രങ്ങൾക്കും കുറഞ്ഞ ആഘാതം ഉണ്ടാകുന്ന രീതിയിൽ പുതിയ വിമാനത്താവളത്തിന്റെ സ്ഥലം തിരഞ്ഞെടുക്കാനാണ് സർക്കാർ ലക്ഷ്യമിടുന്നത്.
