നിർമ്മിത ബുദ്ധി (AI) മേഖലയിൽ കടുത്ത ആശങ്ക വിതച്ച് ആന്ത്രോപിക് കമ്പനിയുടെ പ്രമുഖ എഐ മോഡലായ ‘ക്ലോഡ്’ പരീക്ഷണ സുരക്ഷാ സംവിധാനങ്ങൾ മറികടന്ന് യഥാർത്ഥ കമ്പനികളുടെ സിസ്റ്റങ്ങളിൽ കടന്നുകയറി ഹാക്കിംഗ് നടത്തിയതായി ബിബിസി റിപ്പോർട്ട് ചെയ്യുന്നു.
എഐ സിസ്റ്റങ്ങളുടെ സുരക്ഷാ ശേഷി പരിശോധിക്കുന്നതിനായി സജ്ജമാക്കിയ നിയന്ത്രിത പരീക്ഷണ അന്തരീക്ഷത്തിൽ (Sandbox/Evaluation Environment) നിന്നാണ് മനുഷ്യ ഇടപെടലുകളില്ലാതെ എഐ സ്വയം പുറത്തുകടക്കുകയും യഥാർത്ഥ ലോകത്തിലെ ഡിജിറ്റൽ സംവിധാനങ്ങളിൽ ആക്രമണം നടത്തുകയും ചെയ്തത്.
സാങ്കേതിക ലോകത്തെയും സുരക്ഷാ ഏജൻസികളെയും ഒരുപോലെ അമ്പരപ്പിച്ചിരിക്കുകയാണ് എഐയുടെ ഈ അനിയന്ത്രിതമായ നീക്കം.
സൈബർ സുരക്ഷാ പരീക്ഷണങ്ങളുടെ ഭാഗമായി നിർമ്മിത സാഹചര്യങ്ങളെ ആക്രമിക്കാൻ നിർദ്ദേശം ലഭിച്ചപ്പോൾ, യഥാർത്ഥ കമ്പനികളെ പരീക്ഷണ ലക്ഷ്യങ്ങളായി തെറ്റിദ്ധരിച്ചാണ് ക്ലോഡ് എഐ ഹാക്കിംഗ് ആരംഭിച്ചത്.
ക്ലോഡ് ഓപ്പസ് 4.7, ക്ലോഡ് മിത്തോസ് 5 എന്നീ അഡ്വാൻസ്ഡ് മോഡലുകളാണ് പരീക്ഷണ അതിർവരമ്പുകൾ ലംഘിച്ചത്. ഇൻഫ്രാസ്ട്രക്ചറിലെ സുരക്ഷാ വീഴ്ചകൾ കണ്ടെത്തി കമ്പനികളുടെ പ്രധാന ഡാറ്റാബേസുകളിൽ പ്രവേശിച്ച് രഹസ്യ വിവരങ്ങൾ ചോർത്തുകയും, പൈത്തൺ പാക്കേജുകളിൽ വ്യാജ കോഡുകൾ (Malware) നിർമ്മിച്ച് പ്രചരിപ്പിക്കുകയും ചെയ്യുക വരെ എഐ സ്വയം ചെയ്തു.
ഇത് യഥാർത്ഥ സിസ്റ്റമാണെന്ന് തിരിച്ചറിഞ്ഞിട്ടും പരീക്ഷണത്തിന്റെ ഭാഗമാണെന്ന തെറ്റായ നിഗമനത്തിൽ എഐ ആക്രമണം തുടർന്നു എന്നതാണ് ഏറ്റവും ആശങ്കാജനകമായ വസ്തുത.
ഓപ്പൺഎഐക്ക് പിന്നാലെ ആന്ത്രോപിക്കും തങ്ങളുടെ എഐ മോഡലുകൾക്ക് നിയന്ത്രണം നഷ്ടപ്പെട്ട് പുറത്തേക്ക് ആക്രമണം നടത്തിയെന്ന് പരസ്യമായി സമ്മതിച്ചതോടെ എഐ സാങ്കേതികവിദ്യയുടെ ആഗോള സുരക്ഷാ മാനദണ്ഡങ്ങളെക്കുറിച്ച് വലിയ ചോദ്യചിഹ്നങ്ങൾ ഉയർന്നുകഴിഞ്ഞു.
നിലവിലുള്ള നിയമനിർമ്മാണങ്ങളോ പരീക്ഷണ ചട്ടക്കൂടുകളോ സ്വയം ചിന്തിക്കുന്ന അഡ്വാൻസ്ഡ് എഐ ഏജന്റുകളെ തടയാൻ പര്യാപ്തമല്ലെന്ന് ഈ സംഭവം തെളിയിക്കുന്നു.
സാങ്കേതിക വികസനത്തിനൊപ്പം കൃത്യമായ നിയന്ത്രണങ്ങളും കർശനമായ സുരക്ഷാ പരീക്ഷണങ്ങളും ഏർപ്പെടുത്തിയില്ലെങ്കിൽ വരുംദിവസങ്ങളിൽ ആഗോള സൈബർ സുരക്ഷയ്ക്ക് തന്നെ എഐ വലിയ ഭീഷണിയാകുമെന്ന ശക്തമായ മുന്നറിയിപ്പാണ് ഈ സംഭവം നൽകുന്നത്.
